爆機狂迷：Neo上身改寫電影結局

睇過Matrix第三集《驚變世紀》有無對當中劇情唔滿意？甚至要有改寫結局嘅念頭？繼多年前推出過《EntertheMatrix》遊戲後，今個星期又將會推出一款全新Matrix遊戲《TheMatrix：PathofNeo》，玩家等到頸都長，終於可「直接」變身成為Neo，喺Matrix世界冒險，甚至將電影情節改寫，炮製一個新結局！

記者：許福合

遊戲資料

主機：XBOX
開發商：Atari
類型：動作
人數：1人
發售日期：11月11日（PS2版將於12月推出）
售價：$299

一Game打齊三集Matrix

上一集《EntertheMatrix》喺03年推出，據資料顯示銷售數字就已經多達600萬套！可見Marix嘅吸引力，今次華卓斯基兄弟聯同Atari參與開發嘅《TheMatrix：PathofNeo》，內容包括晒Matrix三部作品，加埋Neo親身上陣，吸引力大增。

■Neo差啲跌落街呢幕，係佢體驗真實同虛擬嘅開始。

■呢個場景似曾相識，不過人物造型未見過喎！

■被多個Smith圍，各位有無印象？

■一拳打落Smith塊面，打到佢臉都變形。

■Morpheus遊戲同電影真係一模一樣。

■慢動作式畫面，係Matrix特色。

■呢幕同警察打，筆者印象最深刻，好有電影感。

■天台打Matrix內的Agent，第一集內的經典場面。

改寫Matrix結局

今次《PathofNeo》劇情係以Matrix三集內容做故事背景，所以經常會見到唔少曾經喺電影出現嘅情節同畫面，好似Neo同Smith多場對決，喺遊戲內得到重現，另外電影多名主角都會喺遊戲登場，如Fans至熟識嘅Morpheus、Trinity等，感覺既似睇緊電影，但又可以親身參與其中。
《PathofNeo》玩法主要動作為主，但係打打殺殺嘅同時，喺每一關內，都可能要玩家作選擇同決定，不同選擇會引發不同劇情，最後更可能出現一個不同結局，好似Fans最關心Trinity同Neo嘅結局，如果你唔係太滿意電影嘅設定，喺遊戲內就有能力改寫！

輸入程式學技能

筆者對Martix世界，其中一個最感興趣就係可以學唔同技能嘅學習程式，電影內Neo都係靠呢啲程式發圍，學識點樣戰鬥，同運用各種槍械武器，《PathofNeo》內都有呢個系統，程式會令玩家操控嘅Neo，輕輕鬆鬆就可以精通各種技能同武器，另外遊戲還比電影多出個類似RPG遊戲角色升級系統，玩家可按喜好選擇Neo能力升級，創造一個獨一無二嘅Neo陪你闖關！
另外當然唔少得威力特大嘅必殺技，受條件所限，必殺技嘅使用要因應時機，通常喺每關打Boss時使用最佳！而打鬥最過癮之處，唔係打得幾勁，而係遊戲極力模仿番電影場面，Matrix式嘅招式、慢動作、避子彈、反地心吸力動作等等，Fans睇番就最回味。

■一字馬雙飛，一次兩件。

■同Morpheus打番場，就係Neo成為救世主嘅訓練班。

密碼視野看Matrix

Matrix內真實同虛擬世界難以分得清，同樣玩法亦都加進遊戲內，Neo只要運用「密碼視野」(CodeVision)，整個世界都會還原，大多數景物都會由一串串數字所組成，顯現在最「真實」嘅模樣，而Neo只係處身喺密碼視野內，能力會大幅提升，除咗容易找出敵人所在，去到遊戲後，要揭開母體秘密，都係要靠佢！另外，當遇到敵人似乎打極都唔死，亦不妨開密碼視野「偷睇」佢，亦有機會找到佢嘅弱點所在，平時亦可能找出各種隱藏秘密，所以有機會不妨經常周圍「裝裝」！

■運用密碼視野能夠睇清楚周圍環境。

■呢個超多Smith場面，夠晒震撼。

■Neo嘅拍檔、朋友都會喺遊戲內出現。