新鴻基地產喺九龍站嘅摩天大廈英文叫ICC，中文終於改做「環球貿易廣場」，噚日舉行動土儀式，冠蓋雲集，主禮嘉賓包括特首曾蔭權、中聯辦主任高祀仁，副主任黎桂康，外交部駐港特派員楊文昌等。作為主人家，郭炳湘同郭炳江一早就到場招呼貴賓，至於三弟郭炳聯唔知係咪要留守喺公司多一陣，遲過兩個大佬到。
除咗郭氏三兄弟，郭家女將亦有現身：郭老太同郭炳湘夫人亦滿場飛，在一眾西裝友之中份外搶眼。在場所見，好多官商巨賈老遠見到郭老太都會行過去同佢打招呼，可見郭老太嘅地位幾咁巴閉。至於郭炳湘夫人，亦唔係一般只係識行街買衫嘅名太，噚日佢幫老公招呼賓客，長袖善舞。華華周圍望，希望搵吓見唔見到郭家另外兩位新抱，可惜搵唔到，問新地中人，佢哋亦話唔覺另外兩位郭太有嚟，若然兩位郭太都嚟埋，兩代四太，就真係熱鬧。
李華華
