JF旗下的投資理財中心開業18年，噚日搞咗個慶祝酒會，公司行政總裁余義焜（圖右）話，自己都係87年加入公司，同間行年資一樣，當年開業之時只有6個員工，家吓就有成20幾個，來年計劃請多6個銷售人才，目標係做多25%生意。
做基金起家嘅余義焜同華華講，佢家吓手持9隻基金，但自己比較怪，唔望全部一齊升，因為可以齊齊升，即係有機會齊齊跌咁話，反而希望有啲升有啲跌，只要跌少過升就得。
在場有投資客戶見余總裁講得咁開心，即時就問：家吓應該買乜基金？佢答話個個人唔同，但自己就係「分散投資」信徒，最鍾情對沖基金，又話可以私底下show自己嘅投資組合畀個客睇，咁識冧客，難怪44歲咁後生就上到高位啦！
余義焜做基金，其實佢出身名門，係余仁生後人，余家以「經義在其中」排名，佢就係義字輩中人，當年幫手將公司私有化的余義漢亦係呢一輩；講開余家，因為枝葉繁衍（經字輩都有13個仔），各房人生咗仔都要互相通報，以免撞名。