韋根今季第一次喺英超蒲頭就嚇人一跳，而數隊波近期最「出位」嘅球員，當然係近兩場波開兩次「首球」嘅法國後衞捷邦達喇！ 近日，韋根老細韋倫見呢個捷邦達表現對辦，就即刻提出加薪兼續約。換轉係我求大俠嘅話實唔答應，幾大都等其他大球會出手，到時重唔發過豬頭？但係捷邦達唔似求大俠咁勢利，話雖然有球會斟佢，但係都好大機會會留低。 點解捷邦達對韋根咁感恩圖報？原來佢上季踢法甲球隊巴斯蒂亞嗰陣因膚色問題被當地球迷襲擊、侮辱，今季來到韋根就感受到球迷嘅熱情，呢啲嘢對於備受種族歧視嘅佢嚟講，梗係比錢緊要喇！