阿Anne成日讚和仔聰明乖巧，但就最鍾意整蠱我，「佢最鍾意同你玩！」每次見我都要考我IQ，例如哪兩個數字唔睬對方（九唔搭八）、7-11是甚麼「色」（唔休息），小兒科啫，「三個人看日落，猜一個字。」唉吔，終於俾佢考起，直到家都唔肯講答案我知。
「你試啖，估吓係乜？」今次終於輪到我！我把大樹菠蘿的核，去了外層啡色軟軟的衣，露出黃白色的肉，用少少鹽吊味，煲它10分鐘，口感像果仁，拿來給和仔試。「杏仁。」錯。「栗子」錯。「合桃。」錯。喂，咪亂噏啦！「大樹菠蘿核吖嘛！我一早就食過啦！」這食法其實是Anne教我，佢又點會唔傳授畀佢得意徒弟吖！蠢咗㖭！「咁你知唔知點樣可以防止啲果蠅啄和在內裏產卵？」「用袋套住囉，果實大啲就轉大啲個袋，一棵大樹菠蘿要成5-10年才有收成嘛！」重繼續蠢㖭！考佢唔到，重俾佢攞威！「大細路！」我向Anne投訴，佢竟然咁答我就算，激氣呀！（四十）
阿花