個市忽然彈番上去，只要啲人對禽流感冇咁驚，或者禽流感新聞恐懼症消減，個市足夠吸引投資者揸貨。
恒指大升194點之後，又點睇？建行（939）昨日擺脫早前「兩價制」，高收2.45元，升0.10元，成交金額達63.4億元，係前日嘅22倍。唔理乜嘢人買上去，啲銀彈咁掟法，肯定有下文，對帶旺股市氣氛，有好大幫助，所以個市重有得去。
中銀C輪4644：滙控（005）派季息，與建行忽然殺上，對中銀（2388）有刺激作用。中銀收14.75元，升0.25元，短期向15元推進，跟住有機會上試15.40元。
中銀C輪炒得過，4644係正路之選，明年2月杪到期，輪價8.7仙，溢價只係3.4%，槓桿率則高達17倍（有效11.1倍），引伸波幅18.2%。
如果想爆炸啲，則揀9068。輪價58仙，係每份輪兌1股正股，睇起上嚟係「毫子輪」，唔似得4644係「仙輪」。9068明年6月底到期，溢價4.8%，槓桿率25.4倍（有效12.1倍），引伸波幅14.8%。
港交所C輪3555：港交所（388）派完成績表後跌50仙，收26元。吼低買C輪3555，年底夠鐘，溢價0.6%，槓桿率6.3倍（有效6倍），引伸波幅27.6%。
章盛