報業市場近日風起雲湧，重湧到爆炸，對於做新聞嘅人，競爭大但機會亦多咗，多得班出錢嘅老闆唔少。中原地產主席施永青搞嗰份免費報《am730》，唔經唔覺發行咗幾個月，施老闆同華華講，為咗份報紙，成日頭痕，不過份報紙嘅成績比佢預期好得多，第1個月cover到成本三分一，第2個月就有4成，到第3個月增加到一半，雖則重係要蝕，但佢話明自己好公開，透明度高，一定會實話實說，唔會好似對手咁，只係識「唱」佢。
華華問佢往後有乜新計仔催谷銷量，施老闆大大聲話：我只係負責畀錢同埋供稿，計仔要等啲「諸侯」（員工）去諗，唔會自己諗計，因為古時啲皇帝一諗唔通，就會去後山吊頸！講完重批死《蘋果》一定會用「施永青吊頸」做標題，搞到華華都唔知點答佢，冇理由俾佢批中啫，所以犧牲呢條好題，諗過第二條。
李華華