滙控（005）第3季股息派0.14美元，增派7.7%，市場有啲好反應。滙控收122.30元，升40仙。恒指由升變跌然後再度升，埋單有37點進帳。
好多股票已經跌到殘晒，睇數據，夠晒吸引力。只不過，日日對住啲禽流感新聞，又心慌慌。總之𠵱家賭股票與賭窩輪，限注為上。
滙控C輪4907：滙控派息，市場收貨。如果禽流感事件唔再惡化，滙控有機會再升啲。滙控今次股息折合股價約0.9%，本月23日除息，C輪溢價，要加埋呢個因素，但計落都係好低。
遠期滙控C輪，可以揀4907，明年4月初夠鐘，輪價25仙，溢價2.6%，槓桿率48.9倍（有效20.2倍），引伸波幅11.6%。
和電C輪9609：和電（2332）見過10.50元，收10.25元，升1格。和電新聞多多，耐唔中升吓，但現價已較去年10月招股價高出7成，PE唔知點計（往績513倍，今年上半年又蝕3.52億元），市值高達484億元，要年賺幾多先至可以令人覺得佢值咁嘅價錢？和電C輪9609，成個市場只此1隻，睇吓溢價、引伸波幅，買落去，輸多過贏。成個市場得1隻，唔係代表值得買，你估係古董？
章盛