周中球壇水盡鵝飛，筆者想趁真空期講吓主要聯賽一啲易捉路球隊。最易幫人贏錢往往唔係強隊，而係啲博彩屬性鮮明嘅中游分子。
當各聯賽逐漸入局後，某啲球隊嘅屬性就慢慢現形。第一類係「主強客弱型」，代表係英超布力般同埋西甲皇家蘇斯達，好似布力般最近聯賽開「單跳」，就因主場贏作客輸；皇蘇雖然啱啱喺主場不敵奧沙辛拿，但整體「主績」唔錯，作客就五場得一分，失十五球，作客唔捧對家等幾時？
第二類係「硬淨型」，典型例子係西甲馬體會，同埋意甲基爾禾、錫耶納。馬體會唔易被擊敗，尤其係作客水準穩，唔贏至少都摸和你，失球又少常開「細」。意甲錫耶納同基爾禾就周不時「單跳」，讓人讓唔起，受讓就抵捧；前日兩軍交鋒，錫耶納果然主場讓唔起基爾禾，重輸埋。
第三類「外強中乾型」，為歐洲賽而顧唔掂聯賽，西甲貝迪斯、意甲森多利亞踢歐洲賽前嗰輪聯賽成日失分，擺明屬於呢隻。文：藍鑽石