「費查在我面前入波！」成為曼聯對車路士的座上客，親身體驗到奧脫福球場六萬球迷的聲勢，雖然我個人不是曼聯的球迷，但受四周紅魔鬼球迷的感染，不期然也為曼聯打氣；結果在紅海一片下，見證曼聯一場翻身仗，亦見證車路士今季聯賽首場敗仗。記者盧漢傑曼徹斯特直擊
球賽在英國時間周日下午四時才展開，但我提早兩小時到達奧脫福，球場四周已經迫爆紅魔球迷；特別在入場必經之路SirMattBusbyWay，至少已有四五百人聚集，邊飲啤酒邊談波經。曼聯MegaStore排隊付款人龍，就好像「唔使錢」；球場四周亦布滿售賣曼聯紀念品的小攤檔，比較有趣是印上球員模樣T恤，其中朴智星一款更是「朴智星頭李小龍身」，唔通英國人連中國人同韓國人都唔識分？
曼車fans隔山罵戰
入場秩序良好，我坐在東看台高層，在龍門後邊，還要高高在上，要睇清楚球星就無可能，不過起碼同場加插曼車球迷罵戰。東看台低層是作客球迷專區，車路士球迷雖然只得三千人，但人丁單薄都不脫摩連奴式牙擦本色，「WeareChelsea,Wearechampion」，就好像刺中上季四大皆空的曼聯迷要害。紅魔球迷立即「United,United,United……。」反擊，高潮在三十一分鐘出現，C朗拿度一輪插花，傳到遠柱，毫不起眼的費查一頂入網，yeah……費查就在我面前入波，全場陷入瘋狂狀態，除了低層少部分藍軍fans。
半場首球雲佬大熱
半場休息，球迷忙於買啤酒、去廁所，還有趕下注；奧脫福內設投注站，最過癮是有得賭下半場首球，大熱仍是六倍的雲佬，朗尼同杜奧巴都有七倍，結果冇波入全部「泡湯」。
換邊後，最忙碌仍然是我面前的龍門，車路士大舉反擊，變成雲達沙表演時間，近距離救出林柏特射門；完場前幾分鐘，林柏特更有射罰球好機會，連坐在我前面的紅魔球迷都緊張到用手掩眼，結果……曼聯保住三分落袋，車路士就連聯賽不敗身都被破埋。
完場後，跟住班曼聯球迷一路行出球場，見球迷又唱歌又跳舞，忽然間想起二十年前，爸爸拖住我去睇南華對精工，都係差不多咁熱鬧。
