本港銀行「超額」加息衝擊唔細，加上禽流感可大可小嘅影響，港股又再掉頭急挫，恒指接近低收，報14365，大跌220點，期指跌少啲，收14312，低水收窄到53點。
港股噚日一跌，恒指又落番20日線（14499）同10日線（14458）之下，短期會再尋底，希望在前低位14189之上守得住，個人對後市看法仍持較樂觀態度，若真係跌到雙頂量度跌幅的14000水平，將係低吸嘅大好機會，預期年底的好市，恒指可望重上15500的高位。
鎮海煉化（1128）私有化條件未公布，其他4隻石化股，喺噚日嘅大跌市中，仍然有好強勢表現，上海石化（338）同中油（香港）（135）都只跌1個位，中石化冠德（934）平收1.20元，而儀征化纖（1033）就高收1.47元，升8仙。相比股價，儀征嘅NAV最高，亦最吸引。
除咗石化股可以尋寶外，華彩控股（8161）同寶威控股（024）亦係有機會升幾成嘅股票，華彩噚日平收2.55元，而寶威則收0.62元，升2仙。
每股淨值達1.61元
9月20日推介華彩（當時稱金交所），股價2.15元，10月下旬升上2.90元後才出現調整。基金好睇好華彩前景，在現水平仍不斷收集，預期未來股價有機會升到4至5元水平。
寶威係華彩嘅大股東，持有3.8億股，佔26.84%，寶威發行10.5億股，即1股寶威持有0.36股華彩，以華彩股價2.55元計，每股寶威佔0.91元。寶威本業經營鋼鐵業務，每股淨值約0.7元，連同持華彩權益計，總值1.61元，股價大折讓61.5%！
華彩成功變身彩票股後，寶威在今年8月出售8000萬股，作價1.29元，套現淨額約9200萬元，再加上手持華彩股票升值，05年度的盈利將會急升。
寶威升勢若持續，即可確認同時升破10日、20日同50日平均線，初步目標係0.68元，整固後再上，照度上去，目標將指向0.92元。
中國彩票市場發展潛力確實好大，但亦有政策同社會風險嘅因素，所以要訂下止蝕位或上移止賺位方式持有，賺到盡。
郭兆誠