噚日傳出孫燕姿喺一個月前同男友丹尼斯分手嘅消息，馮仁昭聽講分手原因係孫燕姿對呢段情冇感覺，丹尼斯又覺得女友成日唔喺身邊，兩個人聚少離多，於是決定結束四年情，不過一對小情人個心其實好唔捨得對方，大家都需要冷靜一吓。
孫燕姿同丹尼斯嘅朋友證實佢兩個已經協議分手，早排佢哋兩個喺電話裏邊嗌交，原因係打電話搵唔到對方，成日鬧交就好傷感情，同好疲倦。加上丹尼斯早排轉新工，收入同事業都未係好穩定，佢覺得女朋友愈嚟愈紅，賺錢又多，開始對呢段感情有壓力。
談情變低頭喊
孫燕姿上個星期錄影中視《愛上九點半》，提到感情事，佢有啲落寞，主持人吳宗憲問佢係咪有變化？孫燕姿就低頭喊起嚟。前日佢錄影《志永智勇電力學校》，兩次提到男友，佢都話：「現在不方便談感情。」噚日佢又錄影《康永當家》時，被問到會唔會嫁畀丹尼斯？孫燕姿斬釘截鐵話：「不會。現在還不是時候，沒有那個衝動，不是為了工作。結不結婚不重要，婚姻的路很長遠，也可能四十歲後才結婚。」問到男友做乜嘢事最令佢難過，孫燕姿話：「欺騙。」而好朋友做乜嘢事令她難過？佢話：「背叛。」
