內地禽流感新聞，令人擔心，港股一開即跌，埋單唔見220點，其他亞太區股市，冇港股咁衰。長和系繼續成為淡友掟貨對象，分別跌3.6%與2.8%，跌幅大過個市。如果大市回穩，長和彈幅將會較大，吼吓相關C輪可也，當然，注碼咪太大，要記住風險。
恒指C輪3462：恒指收報14365，唔排除再跌多些少，但近期主要股市都冇因禽流感而走晒樣，如果外圍繼續穩定，港股亦會隨時出現似樣嘅升勢。
吼位買恒指C輪，搏殺格向3462埋手，輪價0.111元，年尾夠鐘，溢價2.9%，槓桿率38.1倍（有效18.9倍），引伸波幅18.5%。隻輪波幅唔細，恒指每變動100點，輪價升跌13%。另1隻熱門恒指C輪9224，恒指每變動100點，輪價升跌10%。
中石油C輪3489：上周五紐約期油下跌，昨日喺亞洲時段再回落啲，中石油（857）收5.95元，跌0.10元，再跌三兩格嘅話，博反彈，買C輪3489，明年2月初到期，輪價50仙，溢價3.9%，槓桿率11.9倍（有效8.1倍），引伸波幅28.5%。隻輪上落快，做嘢以短炒為上，做即市有錢落袋見利即收。
章盛