大企業不時都會出錢贊助公益活動，回饋一下社會之餘，又可以宣傳企業形象，好似滙豐咁，就同香港貿易發展局合作，以獎賞形式鼓勵中小企業提高環保意識，滙豐銀行集團公共事務部對外事務高級經理盧陳秀琼唔肯透露贊助金額有幾多，但一講起環保，就非常雀躍。
盧太同華華講，滙豐除咗對外贊助人，內部都有好多環保相關嘅指引，好似請客唔會食魚翅，水電冷氣及影印都有規限，盡量節約；中秋之後會回收月餅盒，過時過節又會鼓勵員工捐出糖果、餅乾等食品，連員工飯堂的剩餘物資，都會以環保方式處理；甚至貸款畀林業相關的項目，都將環保作為其中一個考慮因素，重話相關嘅條款，遲啲可能會延伸至淡水業㖭。咁係咪平啲息呢？