領匯再次上巿，今個禮拜日公布，下禮拜一招股，再下個禮拜掛牌。第1個問題：當然係值唔值得認購？
財經界中人有啲保留。原因係加咗息，去年招股時，銀行利息似有若無，現在大額3個月定期可以攞到4厘幾，領匯若然得5厘幾，又確實唔太吸引。
商場界中人態度就好唔同。佢哋話一定入飛。原因係領匯現時嘅商場，在官僚領導下，已經衰到貼地，就算禽流殺到都唔會再衰得去邊。第日上咗巿，由新公司管理點都會值租啲。買佢，係博商場價值上升，係相信私營比官營效率高。
第2個問題：驚唔驚再蝦碌？
政治形勢現在完全唔同。大班去年倒董，今年挺曾，睇怕冇阿公阿婆玩嘢。就算有其他官司，未必足以推翻整個上巿計劃，何況啲官員已經學乖咗少少，保薦人亦比去年小心，冇提早畀本招股書人搵漏洞咁笨。
合共袋5億
講起保薦人，佢哋好肥仔。聽講佢哋合共收房委會成5億，但唔覺有乜做。好似個史無前例嘅「退股機制」，初初竟然連盡職審查都唔做，就口輕輕話得。你話萬一招股期間又有人入稟，咁啱禽流感爆發，到時10萬人退股，應付唔嚟大混亂，咁金融中心聲譽何存？
第3個問題：支唔支持領匯上市？
私營效率高、市場勝官僚。呢兩樣嘢大把證據，唔使拗。所以領匯獨立於房委會，係值得支持嘅。
李華華