汪明荃（阿姐）及郭可盈為爭台慶的「最佳女主角」獎，戰況愈來愈烈，前日郭可盈更公開指阿姐應奪「星輝大獎」，以往該獎的得獎人均年約七十，現年五十八歲的阿姐不甘被升上神枱，反擊說：「嗰啲係畀老人家嘅，未輪到我！」
無綫《萬千星輝賀台慶》於下周六（十九日）舉行，最受注目的「最佳女主角」競爭亦進入白熱化，戰況最激烈的是憑《我的野蠻奶奶》獲提名的汪明荃（阿姐），及分別憑《酒店風雲》和《心花放》提名的郭可盈。
阿姐已於○一年憑《婚前昏後》奪得女主角獎，不過甚少演喜劇的她今年在《我的野蠻奶奶》中的潑辣演出大獲好評，阿姐亦多次表示恨攞女主角獎。而另一熱門郭可盈已多次飲恨，前年敗給張可頤後更惹來不少是非，最近有指郭可盈在外經理人合約將於明年屆滿，早前她主動找無綫傾約示好，看來對奪獎志在必得。
阿姐不滿
「嗰啲畀老人家嘅」
到前日，郭可盈在新城電台接受訪問時，竟出口術表示阿姐應該獲「星輝大獎」，顯然是想將現年五十八歲的阿姐升上神枱，因為該獎的得獎者基本上都是年約七十的前輩級人馬。
前晚郭可盈和阿姐出席在喜來登酒店舉行的《國際斯佳美容協會25週年紀念晚會》，郭可盈面對前輩時即主動挽手合照。對於被郭可盈指應奪「星輝大獎」，阿姐顯得一臉惘然，更反問記者：「乜嘢嚟㗎？」當她得知關海山曾獲此獎時，即以野蠻奶奶口吻說：「唔係呀？嗰啲係畀老人家嘅，未輪到我啦，有冇搞錯呀？我應該未到啩，雖然我日子有咁耐，但係唔好啩？我重想攞獎喎。」
黎姿玩夠
「佢好想攞咪畀佢囉」
問阿姐看好自己還是郭可盈奪獎？她說：「唔知呀？邊個攞都冇所謂，個個攞都會咁開心，大家都有努力過先得到呢個獎，我都真係有努力過㗎！」再問阿姐想奪「星輝大獎」還是「最佳女主角」？阿姐說：「你估TVB係我㗎咩？邊有得揀㗎！」不過有傳現年六十九歲的鍾景輝會是今屆「星輝大獎」的得主。
至於女主角熱門之一的黎姿昨日在電視城則說：「如果可盈好想攞咪畀佢囉！我會戥佢開心，不過我自己就冇睇佢做嗰兩套劇，因為嗰時我喺外地拍劇，所以冇留意到。」
黎姿續說：「我都係平常心，邊個攞我都咁開心，邊個鍾意攞就邊個攞囉！舊年我都攞過，今年再攞都係錦上添花，一年一度盛事，最緊要係大家開心。」
向海嵐昨日到新城接受《家天下》客席主持馬德鐘訪問，她亦是「最佳女主角」候選人之一，向海嵐說：「喺我心目中阿姐已經贏晒，佢嘅演出令人眼前一亮，亦都演得恰到好處，自己就未夠班，之前攞過『我最喜愛角色』已經好開心。」
雯女懶理
「講我都唔睇啦」
馬德鐘之前拍《酒》劇時跟郭可盈傳緋聞，昨日亦不避嫌說：「今年有兩大熱，就係可盈同阿姐，自己梗係偏向可盈啦，因為佢喺套劇中做得好好。」
此外，鄧萃雯昨日到IFC出席手表活動，獲大會贈送一隻價值一萬二千元的手表。雖然台慶逼近，雯女卻置身事外，談到有傳汪阿姐只獲實力非凡大獎，雯女說：「我冇睇呢啲報道喎，講我都唔睇啦，何況唔係講我。」
另一方面，近日亦有指周麗淇答應無綫接拍《秀才遇著兵》續集作為換取「飛躍進步女藝員」獎項的交換條件，令原本該獎大熱廖碧兒落空，但《秀才遇著兵》是周麗淇首部劇集，難言飛躍，故受外界質疑。
採訪、攝影：駱華齡、藍文浩、楊潔雯、戴彩煥、卓美娟、陳慧安
