前晚中咗皇馬「一比○」波膽贏薩拉戈薩嘅球迷真係一額汗，睇住羅賓奴射失第一個十二碼，重想試射第二個，好彩中途殺出個卡路士一腳抽入，總算冇挨錯眼瞓兼輸錢。
點解卡路士咁醒唔畀羅賓奴一錯再錯？原來係教練盧森貝高嘅主意，話明第一個畀博到十二碼嘅羅賓奴射番；第二球見羅賓奴火遮眼想嚟多次補鑊，於是叫卡路士代其操刀，搞掂！
講番羅賓奴，雖然加盟皇馬以來聯賽入得兩球波，但係表現好唔錯；除對薩拉戈薩博到兩個十二碼外，上場波之前共為皇馬博到二十九個自由球㖭！
所以呢，羅賓奴其實係皇馬嘅無名英雄嚟㗎！各位前晚贏咗七點五倍「一比○」波膽嘅球迷，真係要多謝埋佢呀！