留意近日快餐店嘅托盤紙，異常精采：吉野家就大大隻字指明某周刊激賞其牛肉飯最健康；麥當勞自從推出了「清新滋選」以來，反轉托盤紙都有好大個營養分析；KFC就大送「食得輕盈」Coupon，打開一睇又有營養值一覽。香港健康熱潮有增無減，間間快餐店都話有健康套餐，不過營養師就指出，所謂「健康之選」之中，唔少都有健康陷阱！
記者：盧家蕙
攝影：楊錦文
模特兒：Shirley@Salvador
營養師：魔鬼在細節裏
今次特別請來羅便臣營養中心的高級營養師黃榮俊（John），為大家進行快餐大解構，他認為香港人追求健康飲食是好現象，但不想誤墮致肥羅網，要參考其營養分析。例如一個重250克麵包，分析指它只含200卡路里，其實可能是以每100克計算，所以看清楚以甚麼作單位，否則吃了500卡路里都懵然不知。另外，營養師絕不建議人選擇任何經油炸的食物。
「留意細字」
「大家亦要留意數據下的細字，就是『不包括沙律醬』，凱撒沙律汁、千島醬，雖然令食物更美味，但卻隱藏了不少脂肪。」
「自選食物健康過套餐」
「套餐雖然抵食夾大件，不過嗰包薯條、脆薯塊，有幾肥大家心中有數，炸雞包都是陷阱，自行挑選食物比叫整個套餐一定好得多。」
快餐健康Tips
（1）汽水糖份高，選擇健怡裝汽水，甜度高卻甚少卡路里。
（2）一杯250ml的現成果汁就有差不多5-6匙糖，想健康可選擇鮮榨橙汁。
（3）自行調節糖水份量的檸檬茶比已沖調的檸檬茶、蜂蜜雪梨茶好得多。
（4）吉野家綠茶是很好的飲料，麵豉湯也算有營養。
識揀日日快餐店都得
Q：如果我日日光顧快餐店，但跟足營養師建議，夠唔夠營養？
A：「其實是可行的，不過要小心配搭，例如麥當勞或KFC，你可以買一個沙律，選多一份含蛋白質和碳水化合物的食物就OK，咁就有齊碳水化合物、蛋白質和足夠的纖維。」而「唔健康」食物大都脂肪含量過高，日日食會導至膽固醇過高，出現心臟、血管問題。咁係咪肥膩度高的食物都敬而遠之？營養師笑說：「偶一為之是可以，但也不要瘋狂地大吃一餐，這樣對身體一點好處也沒有。」
M記豬柳牛肉最肥
麥記BigMac係人都知佢肥大肉厚，營養師當然唔推薦，但「清新滋選」之中，John認為唔少食物都「唔係咁健康」。（按：★愈多代表愈肥膩，最多為5隻）
豬柳/牛肉烤餅
肥膩度：★★★★
豬柳卡路里有414、牛肉烤餅就368，脂肪含量分別是19和13克，John：「醬汁味濃，肉類份量唔少，你試吓自己拎塊豬柳入微波爐叮，啲油即刻咇晒出來。你話健唔健康？」要食可以揀雞扒烤餅，但要去皮、少汁，唔係就408卡路里落肚。
薯仔雜菜沙律
肥膩度：★★★
「薯仔其實唔係肥，肥在佢混和咗惹味的蛋黃醬。」
不健康經典
魚柳包/熱香餅：M記最好賣的魚柳包，只有360卡，但脂肪總含量都有16克，因為魚柳經過油炸；熱香餅塗上植物牛油，灑上糖漿，便攝取了580卡路里，「有薯餅、煎豬柳、炒蛋的早晨全餐更肥。」
M記健康之選
田園沙律：沙律雖然低卡，不過要小心選擇醬汁，揀千島醬只會得不償失，香醋汁是健康首選。
漢堡包：其卡路里只有260，脂肪總含量是9克，想飽肚食佢唔怕肥。
煙肉蛋漢堡：卡路里只有290，又有雞蛋，脂肪總含量是12克，算是營養均衡。
粒粒粟米杯：因為可自行塗牛油，所以想輕盈就要加少啲。
KFC雞皮累事
KFC新推出的「食得輕盈」系列，就吸引不少OL及減肥人士垂青，不過從營養角度睇，一樣多陷阱。
蜜蜜燒雞翼
肥膩度：★★★★★
甜蜜蜜的滋味，每件要支付約230卡路里的代價，因為雞皮累事。
黃金田園沙律
肥膩度：★★★
金黃香脆的雞塊，配上千島沙律醬或日式醬汁，都稱不上健康。
KFC健康之選
綠田園沙律：雖然低卡，只有50左右，但不包醬汁，想健康落醬汁就要輕手啲！
凱撒烤包：以香脆雞柳、新鮮生菜絲、番茄片及碎芝士製成，食晒成件卡路里只係400左右。
熱脆旋風：「以新鮮熱辣的烘焙方式頗健康，不過份量很大，差不多620卡，同人Share食就OK，食一半300卡，也可接受。」
香熱粟米/薯茸/香蜜鬆餅：都是健康的小吃，畀小朋友食就最啱，緊記少牛油、少汁就更好。
吉野家牛肉飯份量太重
賣快餐牛肉飯賣到響噹噹的吉野家，非常日式，大大碗的肉香飯確係幾吸引，專業營養師又點睇？
招牌牛肉飯
肥膩度：★★★★
John一見到佢嘅牛肉飯即刻話：「唔得啦，太多牛肉，我哋每餐係食大約40克嘅肉。（咁少？）係呀，啲肉又唔算瘦，多肉冇菜，一個牛肉飯唔夠均衡㗎！」
蟹子三文魚飯餐
肥膩度：★★★★★
三文魚碎好健康，蟹子就好高脂，食完唔知要做幾多運動先頂得住，真係粒粒皆辛苦。
吉野家健康之選
海苔珍菌泡飯：海苔有豐富的碘質，有中和血液的作用，珍菌有營養價值，配合泡飯更是健康。
煎雞米粉：煎雞食時去皮，加上有配菜，西蘭花含有鈣質、葉酸，蘿蔔有維他命A，以飯代替米粉要澆少點汁。
鹽燒三文魚：細碗菜飯，配上一小件鹽燒三文魚或一件去皮燒雞，有肉又多菜，是John的首選。
