陳奕迅在「拉闊音樂」的一開頭便為大家介紹了一個「吰」字，即係喺的士高嘈完一輪，出到條街對耳都重「吰吰聲」嘅「吰」字。新用法是可用作動詞，例如：「我吰緊呀！」；簡單問候對答，例句：甲：「吰嗎？」乙：「吰呀！你呢？」甲：「吰……」或簡單地形容一種行為，例句：「喂，今晚去邊處吰?!」其實這個「吰」字已清楚講出當晚「拉闊音樂」的精神，台設在人群的中央，像拳擊賽事一樣，表演者可以清楚俯視到觀眾們的熱烈反應，觀眾們越亢奮，越生蝦咁跳，表演者的腎上腺便越上升，釋放更大的能量。
這是Eason跟「拉闊音樂」的一項嘗試，將威化音樂及主音調諧的大型音樂會在香港並不多，可能由於經驗有限，所以當晚台、燈、音都有點在試的感覺，但肯定的是所有人都已付出了一百二十巴仙的力量去試，不試怎麼知？不試怎麼學？有了經驗只會越來越好。
有些四眼西裝友同埋明明天清氣朗都帶把遮嘅穩陣OL，在俾威化音樂吰咗幾吰之後就口中唸唸有詞地離場，有一部份就呆呆滯滯坐咗喺觀眾席上吞口水，因為唔係太知發生緊咩事，乜唔係好似學友咁揸住個蘋果娓娓地唱歌嘅咩？一時之間唔知點畀反應。
圍在台邊全企位嘅Party友就開心咯，香港少吖嘛。Eason當晚很吰，雖然盛臀粗髀，但仍能跳高劈一字馬，跟EO2夾舞，個人認為好睇過阿Rain。要試新嘢便要付出代價，可能有部份觀眾不滿，但試新嘢梗係趁後生，𠵱家唔試幾時試？