數碼港上演中外合璧之雜技馬戲Quidam，在外國幾出名，於蒙特利爾、拉斯維加斯有固定演出場地，甚受歡迎。Quidam來港演出，電台報紙宣傳工夫做得唔錯，有啲號召力。城中VIP重收到邀請，去睇首演（十一月三日晚）㖭。
大班Ｃ係其中一位VIP，佢喺外國已睇過，不過Quidam既然嚟到香港，於是同太太去捧場，點知一去就谷到成肚氣，如果唔係Quidam雜技好睇，就會一早鬆咗人。
點解勞氣呢，據大班Ｃ講，第一，數碼港商場幾乎十室九空，馬路燈光照明好差，好似廣州咁。在停車場停好架車，入到商場，啲指示牌（signage）安排凌亂，大班Ｃ行嚟行去，搵唔到路向，卒之勞煩保安人員帶路。保安員十分有禮貌，於是下番啖氣。
第二，VIP要開場前一小時登記身份證號碼，先至可以攞飛，於是排隊，乜嘢VIP氣派都冇晒，（按，通常VIP飛可以到專枱攞，行埋去講個名就掂。）
第三，中場休息之際，有宣布話VIP客人可到特定地方飲茶。特定地方有人員把關，似係本地洋人，佢哋認飛不認人（對本港名人唔認識），一位局長行入去，俾佢哋阻止，因局長個身上無票也，局長當然調頭就走，大班Ｃ等其他VIP急忙請局長行番轉頭，講咗一輪，先至可以入去。
大班Ｃ話：「雜技團有中國人、東歐人，其實係表演中國雜技西方體操為主，但加上西方之舞蹈、音樂、服飾、編排，全新包裝，咁就轟動歐美，中國人真係要學嘢，咪次次走寶，益晒外人偷師偷橋。但係雜技團請VIP到場參觀，無非係公關嘅標準動作啫，公關公司嘅安排反而令VIP無癮，變成反公關，奇哉怪也！」你估公關好易做咩，睇少一瓣，都會得罪城中名人，累親客戶也。