自從梁榮忠與朱慧敏車廂激吻照片曝光後，忠仔即飛往泰國找女友鍾麗淇箍煲，而事件亦旋即成為娛樂圈熱門話題。
葉璇：
我同忠仔唔太熟，乜佢咁激㗎？不過佢未結婚。佢口才好，但未試過撩我，搵老公或者男友我都唔會搵呢類型，一次不忠百次不容，我老公一定要錫我。
高志森：
男歡女愛好平常，而且男未婚女又未嫁，問題係發生事嘅地點，點解唔搵個隱蔽啲嘅地方呢？開間房有幾貴呢？啲人又鍾意咁喎，除非鍾意打野戰啦。
沈殿霞：
呢件事我真係唔清楚，不過藝人嘅形象好重要，成功非僥倖，所以一定要更加珍惜機會。而且都唔可以話雪唔雪藏嘅，可能怕個女仔（指朱慧敏）唔識點樣面對記者同講錯嘢，所以先叫佢避一避鋒頭，佢唔似忠仔咁身經百戰。
丘凱敏：
同忠仔麗淇都熟，今年書展同忠仔重合作出咗本書，我覺得應該畀機會佢，作為男人就唔好負心、多心搞到分心，最緊要受得住誘惑。
鄭裕玲：
一來我同忠仔唔熟，二來我都唔知邊個係朱慧敏，只知道佢上過我節目一次，而且公司嘅政策我唔方便畀意見。但係我就冇周街𠝹仔，所以我當然有得做司儀啦。
李克勤：
作為朋友我日日都有同佢通電話，有安慰佢，但作為觀眾，我就狠狠地鬧佢。但人情上都希望觀眾畀機會佢，其實每個人都有錯，佢𠵱家都知後悔，我叫佢珍惜自己嘅前途，幸好今次冇搞出人命。
