情繫香港的杜琪峯，對香港存有深厚感情，他希望自己的影片可以有香港的特色和風格，不想因為遷就市場而影響創作，問他何時拍攝首部西片，他謂：「𠵱家我重未ready，拍西片太多規矩，始終冇拍港片咁自由，所以開戲前條件要傾得好清楚，𠵱家我手頭上重有好多戲要拍，我諗要○八年先可完成手頭上嘅片約。其實拍西片，我一啲都唔急，好早已經有外國公司傾我拍西片，但香港嘅工作真係未放得低，過多一段時間都未遲。」
產量少質素高
杜琪峯認為香港影市雖然低迷，但他堅信觀眾依然喜歡看電影，問題是有沒有好戲提供給觀眾，對於打救香港電影業，他的看法是：「觀眾𠵱家好叻，如果成日拍啲爛片畀觀眾睇，啲觀眾係會嬲，唔肯入場，所以作為製作人，真係唔好濫拍，認認真真拍啲好戲出嚟，我相信觀眾一定會入場睇戲，好明顯今年港片產量係減少咗，但質素相對提高番，所以港片上映嘅票房普遍係好過上年。」
家庭篇：妻子全力支持
杜琪峯是一個百分百影癡，他的生活有百分之九十是奉獻給電影，一年在家吃飯不超過五次，大部份時間不是在拍攝現場，就躲在公司與創作組開會或看電影，他的妻子一直在背後默默支持，從沒半點抱怨。
注重健康
杜琪峯笑說：「佢都慣晒！咁多年嚟我嘅工作都係咁忙，就算幾年前我患肺炎，病咗一輪，我都冇停過拍戲，不過𠵱家會比以前較注重身體，煙仔都戒埋，改食雪茄，食少過以前好多啦！返到公司我又會做一輪運動，最近我瘦咗十幾磅，個人冇咁重，真係行起路嚟都舒服啲。」
撰文：陳月媚
攝影：陳志嵐
