流動電話市場一輪購併，好似得番數碼通一個孤零零，但計華華睇，其實佢先至醒，有阿媽新地撐住，唔憂柴唔憂米，趁市場立立亂之際，密密出擊搶3G客。
數碼通執行董事陳啟龍話，行內近半年出現的其實只得「併」沒有「購」，網絡商原股東離場，反映市場競爭激烈。對於有人話佢哋與中移動將有合作，他冇評論，但就強調數碼通不會考慮任何網絡共用的合作模式。
對於有人唔玩，陳啟龍認為無論2G或3G網絡商，原有股東其實已紛紛離場，網絡商必須合併以加強實力，至於數碼通的大股東新地，就絕對「無意離場」。
獎品兌現客有驚喜
數碼通其中最重要搶客招數，係證明到畀啲客仔睇，所有誘人上台嘅獎品都真係有得送，唔係得個吹字。
例如早前同啲客仔玩遊戲，獎品係請佢哋去曼徹斯特，同紅魔鬼曼聯全接觸。
執筆時，得獎者已經到咗曼城準備入場睇曼聯大戰車路士，此文見報時佢哋已經睇完波知道費爵爺重有冇運行。華華同其中幾個傾過，佢哋話本身係曼聯fan，最初見到啲獎品，都覺得冇可能咁筍，但姑且send吓短訊試試，到收到中獎通知，啲親朋同埋自己都唔敢信，直至領獎先知道係「堅」嘅。其中一個球迷話，同事幾十人見佢真係有得去曼城，於是即刻趁住有上台優惠轉晒台。
呢班得獎者嘅結論係︰電訊商要真係搵啲啱香港人口味嘅content，唔好淨係送手機送通話分鐘咁out。唔知其他幾個台收唔收到呢？
李華華