近年發展商同炒家一齊搞到個樓市㷫合合，但喺銀行多次加息打擊下，有啲炒家已經壯士斷臂，撻定走人。好似今年頭恒基開賣嘅鰂魚涌匯豪峰，買家大多係炒家，除咗有實力嘅肯上身外，部份財力弱嘅索性撻定。
蘭西聽聞個盤最少有三至五宗撻定，其中有個炒家早排買咗兩個單位，一直拖住唔成交，最近終於撻咗個高層D室。個單位買入價二百八十幾萬，呎價要六千幾。
其實匯豪峰都只係冰山一角，因為之前唔少炒家以高價賣入一手樓花，𠵱家陸續入伙要上會，如果個市重咁滯，炒家實唔同你講感情，撻定潮一觸即發，到時發展商想㩒都㩒唔住。
電郵地址：[email protected]