禽流感搞到全世界震騰，擔心打到嚟。目前禽流感限於禽傳禽，禽傳人，未試過有人傳人，照計唔使驚佢。權威雜誌ForeignAffairs今年七/八月號講流感，據專家文章講公共應變對策，提出兩點：（一）流感之後果（consequences），殺傷力驚人，影響全球，（二）流感發生之機率（probability），假如全世界國家密切關注、預防，機率唔會高。
但係政治人物往往畀「後果」嚇怕（如布殊總統輕視颶風Katrina之發生，畀颶風之後果「浸死」咗），就算「機率」不高，都會嚴陣以待，提高警覺，故此所有政府都有意無意之間，誇大禽流感，目的係減輕「假如禽流感真係發生」後之公關災難。
講乜都好，人人都怕怕地，搶購「特敏福」。呢晚，左丁山出席盛大飯局，見到好多猛人，好久未露面之松哥亦有到場，松哥與醫管局權威人物交談，紡織界權威球伯問：「蘋果日報講嘅中藥藥方有冇用㗎？」權威人士話：「報紙所講之中藥方，係三間大學醫學院諗出嚟嘅，衞生署網站有詳細資料，報紙可能講得冇咁齊全。你哋信唔信中藥吖？」松哥話：「信，我不時服用中藥㗎！」權威人士話：「信就得啦，搶購特敏福不如買啲中藥返屋企睇門口。假如禽流感演變成人傳人，基因組織有變，特敏福到時是否有效，大家都唔知，平時食得多，就肯定削弱藥物效力。」
一位署長級人馬最近食特敏福治流感，果然藥到病除，不過食完就瞓足一日，可見藥力甚猛，署長叫我哋唔好濫食。醫管局權威人物係西醫，居然叫我哋食中藥，唔聽話就辜負佢一番好意。走去問中醫教授，佢話：「政府猛叫我哋做研究，搵藥方，但冇錢畀。」左丁山對教授講：「呢個時候，政府重唔打你哋心口咩，當公眾服務可也。」