近年在影壇大放異彩的名導演杜琪峯，憑《黑社會》揚威海外，更被譽為巔峯之年。一向敢言的他日前接受本報專訪時，批評時下的藝人如謝霆鋒因負面新聞太多而影響發展，另一方面則看好古天樂假以時日可在影壇獨當一面。
事業篇：工作態度嚴謹
導演杜琪峯的作品、講述洪門風雲的《黑社會》在康城影展與西班牙錫切斯電影節備受矚目後，本屆金馬獎又得到十一項提名，有外國影評認為今年是杜琪峯巔峯之年。而事實上杜琪峯乃能人所不能，他可以三更半夜，突然靈感到便急召所有戲組人員開工，而手足們又毫無怨言地爬起床開工。
選角憑直覺
杜琪峯日前接受本報專訪時說：「又唔係部部戲可以咁做，較個人化嘅戲，又唔使趕期先可以咁拍啫，但有時啲演員嚟唔到，都未必開得成工。」
杜琪峯選角很有眼光，不少甘草或性格演員平時可能不太起眼，但在他的電影中又變成另一個人，杜琪峯表示：「我揀演員都係憑感覺，冇乜特定準則，好似天林叔咁，佢咁大年紀已經唔係咁易記對白，咁我咪盡量唔畀咁多對白佢講，盡量以身體語言做戲。」
劉德華捱罵
杜琪峯是出名要求嚴格的導演，不少與他合作過的演員都被他罵過，但往往被罵完後，他們還是想再拍杜琪峯的電影，但凡事總有例外，陳小春之前演出《柔道龍虎榜》時，因工作態度問題遭杜琪峯責罵後，小春曾公開聲明以後不再與「食雪茄」的導演合作。
對此杜琪峯不以為然說：「喺拍攝現場我鬧一位演員，一定有我嘅道理，我唔會冇事就去搵我啲演員嚟鬧，呢個可能係我拍戲方法，但我鬧人出發點都係為部戲同個演員好，紅到劉德華咁，佢唔合我要求，我一樣會話佢。一位專業演員應該有專業嘅態度，陳小春呢件事我唔想再去評論，總之當時我點解鬧佢，在場好多人都知係乜原因。」
眾香港導演中，杜琪峯是少數敢言的導演，從不怕得罪別人，就如劉德華和成龍的救市言論，他一樣照批評，對於現時流行的經理人制度，杜琪峯亦一針見血地批評：「我覺得𠵱家嘅經理人縱壞晒啲藝人，一個藝人嚟開工，幾個助手嚟服侍，咁周到有時未必係好事，以前周潤發同劉德華嚟開工，都唔使咁多人服侍，佢哋嘅工作態度真係好值得呢一代演員好好學習，佢兩個有今時今日嘅地位，真係辛苦捱出嚟，但呢一輩藝人點解咁耐都接唔到班？係因為普遍藝人質素低咗，又冇乜苦捱，加上經理人同時間安排太多嘢畀個演員做，個演員好難專心做一件事。」
杜琪峯又認為年輕藝人質素下降了，他說：「佢哋太多負面新聞啦！以前點會一打開報紙就係啲藝人嘅負面報道，好似謝霆鋒咁，我本身幾睇好佢，佢啱啱出道嘅時候，係好有條件上位，但太多負面新聞，對發展肯定有影響。咁多時下演員當中，我覺得古天樂嘅外在條件幾好，如果佢肯下苦功，佢係好有機會。」
