701收料站:安瑞科預期績優

701收料站:安瑞科預期績優

安瑞科控股(8289)上市時以全配售方式發售,貨源盡落芬佬同大戶手上,夠晒歸邊。上市頭兩日炒高之後,回吐咗一大輪,近日股價又見異動。經紀黃話,隻股即將在本周四公布第三季業績,如無意外,應該會好靚仔。
安瑞科喺10月中,以每股1.50元招股上市,集資約1.7億元。由於以全配售方式發售,街貨欠奉。掛牌首日勁升近3成,及後保薦人行使超額配股權,有投資者獲利套現,股價一度回落至1.70元,但無耐隻股又再回升,上周五升6.58%,收2.025元,成交股數851萬股,金額1714萬元。
經紀黃話,安瑞科雖然係創業板股,但所從事的燃氣設備製造,喺大陸需求量大,屬高增長公司,就連招股書中的盈利預測升幅亦好誇張。而最緊要係安瑞科的同系公司新奧燃氣(2688),上市多年成績有目共睹,成功由創業板轉去主板掛牌,兼且一路都係基金愛股,所以有人憧憬安瑞科可步新奧後塵。
慕容小初