早前喺內地拍劇集《人生馬戲團》嗰時遇襲受傷嘅無綫武術指導元寶，因為無綫唔同佢續約而要走人，所以無綫一班員工前晚喺將軍澳一間酒樓幫佢搞咗個「英雄歡送會」，擺咗十幾圍。雖然元寶今次受傷係同保護鍾嘉欣及楊思琦有關，佢兩個之前都口響響話會歡送元寶，但結果前晚連影都唔見，而藝員方面就淨係得黃澤鋒同余子明出席。
無綫冇表示
話雖如此，不過元寶仍然幫鍾嘉欣同思琦講好說話，佢話：「佢哋要開工，所以嚟唔到，但已經搵人送咗禮物。」馮仁昭問佢無綫方面有乜嘢表示？元寶就話冇，而前晚呢個歡送會都係由同事發起。元寶重話做咗咁多年，自己都有啲積蓄，所以生活唔成問題。
噚日鍾嘉欣為一個睡衣牌子行騷，馮仁昭問佢前晚點解冇去元寶個歡送會？佢解釋話：「我同楊思琦都要開工，所以去唔到，不過我都有打畀寶哥（元寶），叫佢玩得開心啲，同埋我哋成班人夾份送咗份禮物畀佢，佢都已經收咗。」
