上周恒指全周上升369點，收14585，人心有啲淡淡哋，短期料將偏軟。低位有平貨要買，估計14450─14500可守。
長實C輪9122：上周五，長實（001）跌1.40元，係拖低恒指最多嘅藍籌。入市嘅消息係傳聞旗下隻泓富REITs，上市會有啲阻滯，掛牌之期會後過領匯。泓富集資2.3億美元左右，對於市值近千九億元嘅長實嚟講，非常小兒科。莫講話遲啲上市，就算唔上市，都冇乜影響。如果因為呢單新聞令長實下跌，長實更加有條件反彈回升，長實C輪更加有得博。
博長實C輪，正路之選係9122，隻輪上周五收26.5仙，散18%，係散得最勁嗰批C輪之一。隻輪明年1月下旬到期，溢價7.7%，槓桿率30.3倍（有效12.3倍），引伸波幅25.8%。
和黃C輪4872：和黃（013）收74元，跌0.55元，已否認延遲分拆意大利3G上市，估計跌後可彈升，留意短炒C輪。對象係4872，明年6月尾夠鐘，輪價93仙，溢價4.8%，槓桿率8倍（有效5.6倍），引伸波幅26%。
呢隻輪嘅波幅，細過長實C輪9122好多。
章盛