梁洛施（Isabella）早前去西藏拍戲時又屙又嘔，疑患高山症，於是就喺當地醫院檢查，最終證實係痢疾。Isabella早幾日由媽咪陪伴返香港，當晚佢喺機場出閘時個樣都幾精神，隨後佢去養和醫院做身體檢查。
噚日朝Isabella就喺西貢出席「香港有機節2005植苗典禮」，佢一見到記者，就自動報料話已經打電話叫媽咪幫佢約見醫生，因為佢臨出門口嗰陣屙咗一次，去到西貢又再屙多兩次，所以佢話一完咗個活動後就會去睇醫生。
Isabella又話覺得啲腸唔係好舒服，所以打算同經理人講唔出席夜晚嘅活動。
改往台灣拍攝
Isabella原定今日要飛返西藏一個海拔五千呎嘅冰川繼續拍戲，但由於佢有病在身，劇組已經將原有嘅戲份改去台灣拍。其實Isabella話晒係後生女，唔知係唔係工作太忙，定抑或佢身體真係咁弱不禁風，後生細女成日病，睇嚟真係要好好注意健康。