香港人要真正走向民主之路，當然應爭取盡早普選特首和立法會議員。爭取普選無分界別，繼天主教香港教區主教陳日君及香港教育專業人員協會，相繼動員教友及屬下會員參加下月四日的爭取普選大遊行外，演藝界方面，導演杜琪峯、張同祖、張堅庭及演員何超儀、葉璇和薛家燕等，亦同樣希望特首曾蔭權盡快交出普選時間表。何超儀表示，下月四日若不用開工會上街遊行。張堅庭認為最快二○一六年可普選，葉璇則相信最遲二○二○年可成事。
何超儀：
下月四日上街遊行
「其實我做演員嘅，對政治一向唔係咁關心，不過喺一個民主自由嘅社會，公民就應該有權投票選自己嘅總統或總理，咁香港人想爭取普選特首權利係好合理，之不過個普選時間表係幾時，我就覺得唔好迫得政府太緊要，不過都希望政府盡快交個日期出嚟，至於個日子係早或遲都唔緊要，只要唔好係咁拖，下月四日民主派發起市民上街遊行，如果嗰日我唔使開工，我都會考慮上街支持。」
杜琪峯：
爭時間表唔係作反
「我哋香港人要爭取普選時間表，唔係要作反，只係想得個知字，咁樣大家先會有方向同目標做事，就算政府二○三○年都冇所謂，起碼大家心裏都有個定數。我認為遲唔係問題，但政府如果想顯示一吓誠意，唔想搞到香港再度出現分化，真係應該講幾時可以畀港人達成普選心願，我認為普選時間表唔適宜定得過急，因為香港嘅政黨唔係好成熟，佢哋都需要時間去磨練。」
張同祖：
盼有生之年睇得到
「我覺得政府應該定出普選時間表，唔好永遠得個講字，香港係一個世界都市，市民應享有普選特首同立法會議員嘅權利，我認為愈快定出普選時間表就愈好，呢個係尊重市民嘅做法，我希望有生之年睇到個時間表，如果以後俾我撞到曾特首，我都會問佢幾時先可以有全民普選特首出現？」
葉璇：
十五年籌備換民主
「我都好關心普選呢個問題，照𠵱家香港嘅經濟政治咁繁榮穩定情況嚟睇，我保守估計大約二○二○年左右應該搞得成。曾蔭權上任新特首後，佢嘅才能同民望都唔錯，香港經濟日趨好轉亦有目共睹，不過要舉行普選絕對需要有充足時間去籌備，一定唔可以咁倉卒，所以我推算十五年都差唔多，作為巿民要耐心等候配合。」
張堅庭：
等二○一六年投票
「我相信喺自己有生之年一定會睇到香港舉行普選，我諗最快二○一六年可以完成，到時我一定會去投票。我對香港搞得成普選好有信心，因為自從曾蔭權上任做特首之後，佢同中央嘅關係搞得好好，相信中方都會有信心畀香港搞普選，巿民嘅信心亦都大咗。我都留意到曾蔭權上任後，佢嘅表現好好，我畀佢好高分，都有七十八，有啲嘢重有待改進。不過十二月四日我就唔喺香港，去唔到遊行，但精神上一樣好支持。」
薛家燕：
十二年後應成事
「我好支持普選，曾蔭權上任特首後，香港各方面都有好發展，我畀佢嘅表現有八十分，扣咗嗰二十分就係留個空間畀佢改進。香港要搞普選都需要時間去籌備，我諗十二年後，大約二○一七年有機會成事，其實曾蔭權上咗任冇幾耐，佢都要時間去體驗。」
