咪以為八角只係香料，用來煮嘢。依家禽流感肆虐，藥廠透露防禽流感藥都係由八角製煉而成，令廣西出產嘅八角價格一夜間暴漲三倍，且銷量大增。聽講，今年以來，當地八角嘅收購價變化好大，八角鮮果嘅價錢保持在每公斤一蚊人民幣，乾果價亦只係每公斤四蚊，但三、四日前價格突然暴漲，噚日鮮果收購價已賣到兩蚊四毫，乾果更賣到十二蚊。