新世界中國（917）上次品題係9月18號，翌日股價最低2.55元，最高9月尾3蚊，呢勻輾轉回軟，又係兜底時。
新中NAV6.17元，現價（2.65元）折讓57%，同級數市值祖國房地產股，好似呢期矚目嘅合生創展（754）及中國海外（688），已經創出非典肺以嚟新高，後邊兩隻股，股價相對NAV係倍倍聲計數。呢期合生宣布，話同一波及大摩簽訂協議，向兩者發行總值高達23.4億銀嘅優先票據，唔嘢少，大孖沙似乎繼續睇好中國市場，祖國房地產股重有得玩，又當新中唔係龍頭，NAV折讓因素強，都有得追落後。再講，新中大股東係彤叔，信大股東實力。呢勻港股無力，新中隨勢調整，啱啱又test咗03年條上升軌，支持力度有番咁上下，博上番1年高位3.3元，到時NAV折讓講緊46%，重有大把折讓。
保利可炒分拆概念
保利（119）上星期四復牌，冇乜上落，可以冷敲，又講兩點：第一，保利呢期公布，話同阿媽中國保利簽訂協議，以5.6億銀收購「保利上海」全部權益，保利藉此再獲注入地產業務。由於項目大部份係土儲，所以，唔會為保利帶嚟即時獲利能力，但項目協議收購價，係NAV折讓價（約莫8%），保利又獲阿媽眷顧。第二，保利現價（1.14元）相對NAV3.04元折讓62%，地產元素陸續傾注，可買NAV折讓。又中短線睇，隨住保利地產業務逐步壯大，部份原有業務好似發電項目，已經相對成熟，有得炒保利分拆概念。呢期冷敲價先睇250日線1.4元。
錢雋