煲碟王：《星球大戰前傳III~黑帝君臨》
忠變奸　明投暗　黑武士魔君降臨

無論你係咪星戰Fans，每次有星戰上畫，總感到有唔少壓力，非入場睇不可，今個星期新返3區DVD《星球大戰前傳III～黑帝君臨》對於唔熟悉星戰史嘅戲迷來講，會係一套唔錯入門電影；尤其經常提住口邊嘅「黑武士」，究竟點樣由Jedi武士棄明投暗，搖身一變成絕世魔君，睇完今集，大家就會完全明白晒！

記者：許福合

今個星期碟舖一啲都唔淡靜，淨係《星戰前傳III》落場，就已經搞到人頭湧湧，另外重有幾套好片如《隱劍鬼爪》、《稀人》同《芳心愛漫遊》，都可以消磨一下時間，而下星期將會係無敵組合湯告魯斯加史提芬史匹堡嘅《強戰世界》，雖然個名同故事唔合襯，加上影評差啲，好多人無入場睇，今次新返DVD，就可以補番數，記得留意。

承接第二集故事

雖然話第三集可以解開唔少人對星戰故事，尤其係黑武士嘅迷團，不過星戰故事實在太長太仔細，每一集電影其實都只能算一個章節，以第三集為例，一開始就好似睇到故事中段一樣，對呢套超級長片來講，要戲迷對故事了解程度較高，否則好容易令人睇到一頭霧水。故事承接第二集前傳，最高議長Palpatine與Jedi武士會裂縫加深，互不信任，而Jedi武士Anakin與皇后不理各界壓力展開戀情，Anakin為咗保護皇后，靠向議長取得權力，最後更踏上黑暗之路，成為邪惡DarthVader，更與師傅Obi-Wan展開生死決戰，「黑暗帝君」亦由此而生。

全數碼拍攝製作

一向對星球大戰唔算投入，尤其以往睇番電視台播放星戰陳年影片，以當時技術，當然無得彈，但以今時今日觀眾要求，真係難以睇得上眼，不過今集《星戰前傳III》畫面絕對令人改觀，畫面細緻而真實，原來此片係以全數碼拍攝同製作，畫面真實度高之餘，重配有THX、杜比數碼5.1等等，只要家中器材有足夠「實力」，絕對可以睇得非常過癮。

Disc2刪剪片段

Disc2嘅Bonus內容好豐富，包括製作特輯、演員專訪、刪剪片段等，Fans必睇。