電子傳媒老總A最近頻頻出席不同會議，全部係講WTO或然應變計劃，開會開到頭暈。老總A話：「我已經算開得少，啲政府公僕老友記，日日叫苦，保安局、警察固然緊張萬分，好多部門都要準備應急，碰啱呢排禽流感風聲鶴唳，全世界都緊張到不得了，醫管局啲朋友已經要做餐死，但又要同時為WTO做好兩手準備，佢哋啲管理層真係冇覺好瞓。」
十二月中喺香港召開WTO，有辦法嘅不妨出外放假幾日，以免自己緊張埋一份；到時千祈唔好有意外或者大病，公立醫院或者會好唔得閒，假如到時萬一不幸有南韓式示威，巴黎式街頭打鬥，近住會展一帶嘅灣仔區就會遭殃咯。呢啲係唔係自己嚇自己呢？警方代表喺立法會講得情況好嚴重噃！
老總A認為香港主辦WTO，勞民傷財，得不償失，可一不可再，以後咪再搞同類會議。冇錯，好多外人來港，益晒啲酒店與餐飲場所，或者零售業亦有得益，之不過，社會總成本點計？政府部門勞師動眾，私人部門精神緊張，到時交通擠塞，灣仔區學校停課，呢一切精神時間損失/成本，係唔係由旅遊業賠番出嚟先？如果極唔好彩，發生農民粗暴示威，弄出人命，香港名譽受損，咁就更加弊弊弊。
所有招惹大量示威嘅國際會議以後不如畀晒北京上海搞，如果去晒北韓平壤就更加好，我哋重耳根清靜，可以正常過活，啲主辦虛榮，要唔要都罷。左丁山與幾位朋友決定，世貿會議舉行期間，我哋日夜活動限於軍器廠街以西，一於唔去灣仔銅鑼灣，過海全都行西隧，避開東隧、紅隧，如果抽得出時間，去東京箱根三幾日睇雪，或者去新加坡享受冬天太陽，就更加正斗。
希望事前有關WTO一切之假設，全部落空，一切或然應變計劃，全部唔使應用。