無論你係咪Game迷，《Biohazard》呢隻咁出名嘅遊戲，受歡迎同震撼程度，唔需要點詳細介紹相信都略知一二，不知不覺呢隻遊戲已經出到第4代，今集《Biohazard4》唔再淨係打喪屍，重同時推出一個血淋淋電鋸形手掣，夠晒驚喜，Fans點可以唔捧場！
記者：梁瑋瑜
攝影：楊錦文
ImageModels：璋、Margaret
(C)CAPCOMCO.,LTD.2005ALLRIGHTSRESERVED.
其實GC版嘅《Biohazard4》已經喺早前推出，一眾PS2機主等到頸都長，終於等到PS2版本推出，今次CAPCOM行貨版重揀咗美版推出，故事對白同埋介面全部都係英文，香港玩家唔單止可以更加容易明白故事發展，美版遊戲比日版更加係血腥得多，甩頭爆血場面勁多，心血少啲都嚇餐死！
血淋淋電鋸形手掣
今次行版除咗夠血腥，重有一個驚喜，同時推出專為《Biohazard4》而設嘅電鋸形PS2手掣，同款手掣亦曾經喺GC上出過，外形同電鋸似到十足，血淋淋咁款，血腥味十足，而且重加入N-Motion技術，感應到用家擺動手掣，遊戲嘅主角就會舉槍，非常好玩，唔好睇佢外形三尖八角，拎上手手感同一般PS2掣差不多，售價只係$368，都算抵買，而且全球限量50,000套，值得珍藏。
唔打喪屍打寄生體
今集故事主角係喺《Biohazard2》出現嘅新任警察Leon，經過6年之後佢已經成為一個優秀嘅特務，負責保護總統一家人嘅安全，有一日總統女兒Ashley突然懷疑被恐怖組織擄走，有情報話目擊到佢出現喺歐洲村落，於是Leon就隻身遠赴歐洲去尋找Ashley嘅下落，展開咗呢一個漫長嘅旅程。
以往嘅《Biohazard》淨係打喪屍，今次嘅敵人係一個叫LosIlluminados嘅邪教組織，佢哋將寄生體注入咗其他人嘅身上，令到佢哋對非同類嘅人都會作出攻擊，玩家喺遊戲裏面可以講話危機重重，表面上係普通嘅村民，實際上隨時殺咗你，唔小心啲都唔得。
第一身視點夠爽快
《Biohazard4》同以往《Biohazard》最嘅大分別，係今集唔似得以往咁用第三身視點，而係採用咗第一身視點，鏡頭放咗喺Leon嘅後面，小記試玩嘅時候覺得真實感強咗好多，就算有敵人喺身後襲擊都唔知，實在係好恐怖。小記試玩《Biohazard4》，感覺非常爽快，今集子彈數目夠晒多，殺敵唔使就住就住，一槍打爆寄生體個頭，真係好有快感，不過要熟習操作玩得更加順，就需要一段時間熱身喇。
畫面採用咗全3D製作，支援16:9全屏幕，比起之前幾集更加流暢，好似好多過場位都連接得好順，值得一讚。
GC版我都有玩過，PS2版劇情大致相同，畫面亦都相差唔遠，而且夠晒血腥刺激，啱晒我口味！
Profile
製作廠商：CAPCOM
主機：PS2
類型：冒險
遊戲人數：1人
售價：限量版$388
CAPCOMAsia（23661001）
