響網上買二手汽車零件，乜嘢蠱惑手法都有，編輯部同事又再中招，連續買三樣零件，最後都貨不對辦。原來網上好多零件都係壞嘢翻新，品質唔會太好，一定要睇清睇楚。
記者：伍旋卓
講到買二手汽車零件，除咗元朗劏車場，最平最多選擇，都係上網搵。原來網上買零件呃人招數多籮籮，我哋好小心咁買，都一一中招。
Turbo貨不對辦
汽車零件中，渦輪增壓係最易壞，我哋用$500買咗個原裝Turbo，九成新，連裝就$800。
返到公司，Turbo唔係原裝，中軸又換咗啤鈴，原來係壞嘢翻新，行咗三百公里後報銷。
醒目貼士：一定要睇住佢安裝，唔好行咗去。
四條車軨無條靚
我哋又睇中咗一套$1,000嘅日本版合金軨，八成新。用咗兩個星期，全部軨都花晒。原來買家交收前用灰補番啲花位，所以交易時好新淨。
醒目貼士：唔好夜晚交易，睇清楚有無人工修補。
台灣燈入水
再買一對車頭燈，全新台灣貨$350，一個落雨天立刻入水，連燈膽都燒埋，最後要DIY修補虛位。
醒目貼士：唔好貪平，小心翻版原廠零件。
