港股跌少少，恒指唔見15點。隔晚紐約油價升2.05美元，則扯起晒啲期油C輪，當然，啲期油P輪則唔掂。
期油C輪：期油C輪總共5隻，平均升幅33%。最勁係4920，收50仙，升幅61%，有3球半易手。
隻輪溢價2.1%，槓桿率9.3倍，睇落唔錯，但下周四最後交易，買唔過。4861輪價43.5仙，溢價0.7%，槓桿率10.7倍，睇嚟靚過4920，但亦係下周四最後買賣，而交投非常疏落，昨日得3萬銀，又係賭唔過。
兩隻遠期啲嘅C輪9343與9344，明年2月夠鐘，溢價17%與15%，又係買唔落手。
期油P輪：期油P輪總共5隻，平均跌幅24%。油價個勢向淡，揸期油P輪亦都唔易賺錢，理由係溢價過高。
勉強揀得落手嘅，係9348。明年2月中到期，輪價18.8仙，溢價9.7%，槓桿率12.6倍（數據不斷變化，因為股市收市後啲油價重郁緊）。窩輪共蟹，唔識莫買。期油窩輪，賭少瓣好過。
長實P輪4900：長實（001）跌1.40元，拖低恒指10點。有隻P輪4900，收2.5仙，升32%，打入威水榜第9位。
4900本月22日最後買賣（28日到期），溢價9%，槓桿率322倍。
睇槓桿率，隻輪爆到極，但冇乜用。長實要喺兩個幾禮拜之內，散到73.38元以下，呢隻淡友輪先至有剩餘價值。買4900（昨日有10萬銀成交），好似將啲錢用去打水片。
章盛