呢排啲上市公司動作多，唔係搞私有化，就話搞供股。買中私有化嘅話，自然滿心歡喜，但所持股份要供股，就難免會頭痛供唔供。
其中香港興業（480）昨日的供股計劃，據聞芬佬好似有多少唔滿意，話點解要幫手夾錢同大股東買物業喎。
香港興業今次以12.84億元，同大股東購入荃灣中國染廠大廈，部份代價係由香港興業供股集資支付，6供1，每股3.80元。
經紀黃話，呢幢物業喺早幾年前，以唔夠10億元售予大股東，今次公司高價買回，雖然話曾經翻新過，大股東已賺咗幾億銀，但就要其他股東夾份畀錢，而供股價更比停牌前市價有溢價，難怪有人唔高興。
香港興業近排股價表現積弱，由4.70元跌到落本月最低位的3.575元，跌幅明顯較其他地產股為大，莫非有人咁神奇估到有供股行動，一早沽定貨先？
隻股昨日復牌，收3.65元，跌1.35％。
慕容小初