按揭證券公司前日公布，推出定息樓按，利率五厘至五厘六。恒隆黃為山爆料話，呢樣唔係新嘢，恒隆早喺八十年代初，開賣鰂魚涌康怡花園時，已經有提供。
嗰陣時息口上到二十幾厘，適逢康怡花園賣樓花，恒隆於是推出定息樓按。當時鎖定十厘！睇番家吓，經過連番瘋狂加息，按息仍僅五厘左右。
講番恒隆康怡定息按揭，唔少買家採用。咁佢哋咪要補貼好多？黃為山慨歎，當時要賣樓套現，用嚟發展。暗示冇計。
不過，恒隆優待康怡買家，買樓條款容許，入伙時可改浮息。結果樓盤落成時，息口真係低過十厘，唔少買家轉番浮息。恒隆後嚟賣晒啲定息樓按畀銀行。
當年利率洪峯，冇耐退卻，由逾二十厘縮一半到十厘，今趟加息期，唔知幾時潮退。
電郵地址：[email protected]