日本遊戲一向比較啱香港人口味，不過美版並唔代表無佳作，《GrandTheftAuto》（GTA）就曾經橫掃北美，連亞洲機迷都有唔少成為佢Fans，最新一輯《GTA~LibertyCityStories》就走上PSP推出，雖然遊戲城市仍然係Fans熟悉嘅LibertyCity，不過利用咗PSP嘅闊屏幕顯示，感覺大為不同，加上提供6人無線玩法，未有PSP嘅又多個出機藉口。
記者：許福合
搭車煲機開字幕
《GTA》之所以咁受機迷歡迎，除咗創意夠外，最重要都係自由度高，玩家基本上可以在城巿內任意走動，PSP版都繼承呢個傳統，遊戲內人、車、街燈，甚至水龍頭都可以破壞，就算唔跟住任務進行，喺城巿打橫行都相當過癮，作為一隻「Pocket」遊戲，《GTA》其實相當適合，隨時玩隨時停，至少唔怕忘記落車！
PSP版操控上與PC或PS2版當然唔同，不過都算易上手，而且遊戲一開始，就不斷有提示，提醒用家操作技巧，比較方便嘅係打鬥時，只要按住R鍵，就會自動鎖定一個敵人，玩家要做嘅只係狂按攻擊，當揸車時，按L就會自動轉換到正面，平時L+方向掣就可以360度全方位收看，用落都算好用。玩PSP版除非你必戴耳筒，否則搭車係無可能聽得清楚任務提示，可以按Start進入brief睇番說話記錄，另外亦可以揀選顯示字幕，美版遊戲自然是英文字幕，既方便又明白。
通街搶車無線對戰
PSP版論遊戲玩法，基本上無咩分別，首先LibertyCity嘅超大版圖得到保留，玩過舊版都應該唔會陌生，若然係Fans，應該連地圖都唔使睇就識得行；玩家喺城巿內惡晒，可以隨時郁手打人，至於任務亦好簡單，開初玩家扮演一個黑幫小嘍囉，愈係壞事做盡殺人放火，就可以逐步升級做大佬！遊戲中不能或缺嘅，當然係源自前作，可走出馬路搶車，揸車最過癮處，係可以亂衝亂撞，不過記得當架車出煙時，就要快啲落車換另一架，否則可能爆炸受傷。
喺《GTA》內，死咗就會送到醫院，無晒武器同道具，任務亦要重新進行，通常醫院外會有一架的士送玩家返去任務地點。畫面左下角會有小地圖，按Start就可檢視大地圖，當中會標示任務地點，或重要位置如可儲存同換衫嘅屋企、槍械店等。PSP版其中一個特色，就係可對應無線對戰功能，可同時支援6人對打，可惜係唔可以玩番本篇任務，不過遊戲仍算有趣，幾個朋友來場街頭亂鬥都好好玩。
任務簡單易上手
《GTA》目的係要成為城市大哥大，任務都不外打架或殺人之類，起初任務有「教學」意味，比較簡單，玩落敵人人數同難度都會增加，如果打得太過份，重會引起警方注意，要走佬好失威。
GTA「教學」任務逐關睇
過癮秘技
PSP版《GTA》有唔少秘技已經被人試出來，以下就係筆者收集幾個過癮有趣玩法，不妨試試。
有美相伴
↓、↓、↓、△、△、○、L、R
瘋狂司機
□、□、R、×、×、L、○、○
大大個頭
↓、↓、↓、○、○、×、L、R
通地係錢
L、L、←、L、L、→、△、○
正所謂樹大招風，知名度高嘅遊戲自然多人談論，加上《GTA》內容有唔少過火位，所以經常被人批評意識不良，今集玩家目標要成為LibertyCity嘅大哥大，殺人放火無惡不作，「F」粗言當然唔會缺少，可能被人彈得多，廠商今次都做足表面工夫，官方網頁要先輸入出生日期，未成年不准收看！
官方網址： http://www.rockstargames.com/libertycitystories
PSPWallpaper搶先睇！
製作廠商：RockstarGames
主機：PSP
類型：動作
遊戲人數：1-6人
售價：$320
DreamStore（25753285）
灣仔道188號東方188商場256號舖