比賽呢家嘢，真喺很難預計。好似英國松鼠狗Kitty姐咁，全無比賽經驗，出show前更唔小心跌斷咗隻腳，點知都攞到第二。之後Kitty姐從未輸過，連贏三屆狗展，就連身價貴佢四倍嘅細佬Bobby，都唔夠佢嚟。榮升阿姐級嘅Kitty，原本處於半退休狀態，逗龜為樂，但近日江湖謠傳佢身患重病，離死亡只是一步之遙，令不少好友極之擔心。今日Kitty姐破例接受訪問，用行動否定謠言，重即場表演咗一場時裝騷。
記者：李敏怡 攝影：陳陶鈞
數數手指，我都有四年無公開露面。自從01年狗展後，我打算享受吓平淡嘅生活，點知啲競爭對手見我好耐無蒲頭，就話我有病，有啲重離譜到話我死咗，真係touchwood！我行得食得瞓得，反應重快過細我兩歲嘅細佬，邊度似有病。唔信？等我唱番首歌畀你聽，你就知我中氣十足，鬼打都無咁精神。汪、汪、汪……
表演慾爆燈斷腳都贏
上個月狗展剛剛完結，睇住新一屆得獎者接受加冕，令我想起當年比賽嘅日子。98年，我第一次參加比賽。以前無接受過任何專業訓練，加上比賽前又跌斷咗隻腳，原本已打定輸數。老土啲講句，當吸取吓經驗。點知，又俾我攞咗個第二返來。評判話我好有表演慾，一上到台有大將風範，唔會好似其他狗仔咁，怯場怯到四腳騰騰震，所以畀咗個亞軍我。攞咗個亞軍，我嘅實力被肯定，我想我應該可以再進一步。
Kitty姐時裝騷
愛扮靚嘅Kitty姐，每季都會從日本入新貨，每次花費平均都有三千幾蚊。
蝦細佬實況
雖然Kitty姐強調佢同細佬無心病，但採訪當日，佢卻當住記者面前搶走細佬粒糖糖。
日日晨操練步姿
於是，我同Jacqueline定下作戰計劃。佢搵咗位經驗豐富嘅breeder，教佢點樣訓練狗狗出show。喺比賽一個月前，我哋不停地練習行路、坐定、擺pose。我哋松鼠狗慣咗八字腳，所以行路時，好似醉酒佬，唔係偏左，就係偏右。為咗練習行直線，我堅持每日落街晨操，叫Jacqueline幫我留意吓個姿勢。話唔辛苦就呃你，有時真係攰到死狗咁，但當我上到台，我就會好享受，我係屬於舞台嘅。99年，我終於初嘗冠軍滋味。之後兩屆比賽，我都無輸過。但就喺我事業達高峯時，我選擇離開。
由細到大，我只知我係一隻平凡嘅玩具犬，閒時唱幾句歌、擺幾下尾，逗吓主人Jacqueline開心，從未想過自己會成名。無疑，飛上枝頭變鳳凰，但名利只是過眼雲煙。狗嘅一生，最重要唔係攞獎，而係同主人開開心心咁生活。但為咗參賽，我同Jacqueline都承受唔少壓力。到我攞第三次冠軍時，我想，夠了，係時候退出江湖，展開狗生涯另一階段。
同細佬無偈傾
外面成日傳我同細佬不和，實情係，我哋除咗細個時打過交外，根本就無乜交流，偈都唔傾多句，莫講話爭執、互寸，既然係咁，又點會不和呢？係，細佬係一隻血統好優良嘅美國松鼠狗，身價貴我四倍，但我無因此而妒忌佢。我承認我有藝術家脾氣，唔會主動同其他狗溝通，連Jacqueline都話我係獨家村，但我只係做番自己，我唔想掛住個面具做狗，唔通咁都唔啱？我朋友唔多，但有多多、少少，呢兩個龜朋友，我覺得已經足夠。佢哋好了解我，每次我豎起條尾，佢哋都知我想點。有此知己，夫復何求？
