與其因禽流感而惶惶不可終日，不如打好底子迎戰惡菌，有臨床藥劑師建議巿民，一旦疫症爆發，應多食魚類、豬肉及深綠色蔬菜，保持身體健康，另外亦可服用紫錐花、西柚子精華、乳酸菌等營養補充劑，有醫生則提醒巿民，不但醫院要為疫症爆發做演習，巿民亦要計劃如何過日子。
要過簡樸生活
臨床藥劑師茅菁華指，要增強抵抗力要多吃魚、豬肉及深綠色蔬菜，然後戒糖份，「啲菌係好鍾意糖㗎，你食糖就係變相餵緊啲菌，就好似原本佢係一枝公入咗你身體就做唔到啲乜，但係你自己就做二五仔，專食甜品養住佢，咁你咪會病發囉。」她解釋，汽水、啤酒要戒喝，即使是果汁也不要飲用過量，另外亦可服用紫錐花、西柚子精華、甘草精華、乳酸菌等營養補充劑，「但係真係唔需要儲（抗流感病毒）藥，唔需要咁恐慌。」
醫學會會董陳以誠則說，疫症爆發要過簡樸生活，避免到人多地方，「到時唔會再話行街買嘢，唱Ｋ、飲茶、大魚大肉食好多嘢，唔好抱住可以豪華享受嘅心態，心理上要調整。」他建議巿民先儲存白米、意粉、米粉等。此外，白麵包、罐頭、餅乾，以及可以長期儲存的蔬菜，如菜乾、紫菜亦是儲備的目標，份量要足夠一家人食用六個月，「譬如你一日食兩包即食麵就掂，一家三口咪六包囉，六個禮拜四十二日乘六包咁多。」
他又指，假如自來水供應無問題，則毋須購買樽裝水，「如屋企有BB呢，重要儲埋奶粉㖭。」但大廈管理委員會則應儲存漂白水、酒精及梘液，以及貼在升降機按制上的透明膠片。
本報記者