繼「飛躍之旅」及「歡躍之旅」後，索拉奇藝坊前晚再次登陸香港，在數碼港搭帳幕演出「奇幻之旅」雜技藝術表演，吸引不少名人明星捧場，包括張堅庭與家人、何超瓊、鄭裕玲及呂方、一班應屆港姐、蘇玉華、林建岳女友Monica、王敏德與馬詩慧一家、霍震霆與霍啟剛父子、趙世曾與女友及傅明憲與葉劍波夫婦等，眾人都大讚演出精采。表演期間有小丑邀請觀眾上台一同演出，選中了蘇玉華，令她驚喜萬分，她事後更高呼：「噚晚真係超開心，呢世都唔會唔記得。」 採訪：馮美茵、張止寒 攝影：陳志嵐
逢周六刊出
蘇玉華
踩台畢生難忘
之前我已經睇過佢哋嘅騷三次，噚晚真係超開心，呢世都唔會唔記得。本來小丑係請另一個女仔，但個女仔唔想玩，而我咁啱坐喺第一行，佢咪搵咗我上台囉。我本身係玩得之人，又唔怕醜，佢叫我做乜我咪跟住做。我係做戲嘅，啲動作對我冇乜難度，現場觀眾見到我都喺度尖叫，覺得好驚訝，我覺得好似係自己做騷咁。中場休息嗰陣，啲觀眾都有走埋嚟讚我做得好，有外籍人士就問我做得咁好究竟係咪造馬，真係好搞笑。
杜汶澤
「選址好氣氛佳」
默劇表演好精采，最高難度係人叠人嗰一part，其實呢啲人才內地有好多，好似黎明嘅演唱會，嗰啲雜技團都做到類似嘅感覺，但人哋優勝嘅係衫唔娘、故事性強、有美感，配埋音樂同雜技就好好睇。而且佢哋選址好好，喺數碼港露天向海地方表演，氣氛做得好好。我好肯定蘇玉華唔係造馬，佢係演藝學院畢業生，有豐富嘅舞台經驗，做乜都似，佢上台配合得好好，本來嗰part節目冇咁好睇，我覺得搵到蘇玉華上台，係個鬼佬好彩。
而田蕊妮則說：蘇玉華一上到台就全場起哄，佢好配合，重玩番小丑轉頭，跟住全場嘩然。
張堅庭
「部份鬼魅咗啲」
有啲部份對小朋友嚟講鬼魅咗啲，感覺好黑暗，畀多啲陽光嘅嘢會好啲，不過小朋友都鍾意睇嘅。老實講我都唔係好明，但其實冇需要明，佢係馬戲混合音樂、話劇同雜技，變咗種獨一無二嘅表演項目。香港嘅創意工業可以學吓，可以作借鏡，啲企業、大公司亦應該去睇吓，創意唔一定創作人先有，其實我哋可以抄襲佢跟住再改良，一定可以做得到。
鄭裕玲
「動作難度好高」
我喺拉斯維加斯已經睇過一次，喺新加坡又睇過，遲啲個騷會喺拉斯維加斯再做個新騷，改埋名嘅，我都想再去睇。噚晚個騷真係好好睇，雖然佢哋係sell雜技，但每個節目主題都唔同，而且，啲動作睇落好似好容易，但其實難度好高。
馬詩慧
「個仔睇得開心」
佢哋係非一般馬戲團，佢哋冇動物，集中喺人嘅才藝表演，而且今次主題係「奇幻之旅」，我最難忘係開場嗰時，佢哋將人放喺轉輪入面跟住轉。另外，亦有一班小朋友拎住兩個葫蘆連繩拋來拋去，都令我印象深刻，雖然有小朋友失手，但都值得原諒。我個仔躍穎因為第一次睇，所以佢睇得好開心，不過都曾被現場嘅音響效果嚇一跳，但整體都有八十分。
