提起佛山，唔少人都會諗起「佛山無影腳」，加上最近電視晚晚見到贊師傅拳來腳往，令人對佛山「功夫之鄉」的印象更加深刻。原來佛山真係功夫足迹處處，隨處都可見到各路英雄，今日由詠春派一代宗師葉準師傅，帶大家去睇吓佛山功夫世界。
記者：張逸濠
攝影：Money
Models：Ada、Miu（Thegroup）
鳴謝：金濤旅遊、香港詠春體育會（23816044）
尋找詠春的故事
葉準師傅的父親葉問就係李小龍師傅，即係李小龍的師兄、贊師傅的徒孫。以為打得之人好多都粗聲粗氣，但原來葉師傅十分和藹、溫文，十足武俠小說入面的「內斂」武林高手，而他亦是佛山武林的一部活字典。
原來佛山的武林地位，同本身工藝發達有好大關係。好多人到廣州省城做生意，就要經過佛山，加上當地經濟比較好，於是當地人就有閒心習武。而且好多宗師都在佛山落腳，於是就令佛山成為南中國功夫總滙。
詠春就係在佛山生根的其中一派，當年贊師傅原來是佛山名醫，陳華順在他醫館前開「找錢檔」，最後得贊師傅真傳，再收葉問為徒，經葉問發揚光大，全世界原來已有過百萬他的徒子徒孫。來到祖廟的葉問堂，就可以知道唔少詠春的威水史。
巧遇廣東武林百傑
除了葉問、贊師傅外，佛山知名高手重有黃飛鴻。祖廟內有個黃飛鴻獅藝紀念館，除了展出黃飛鴻生平事迹外，還有電影資料等。但最精采都係馳名世界的獅藝表演，每年都吸引上百萬以上的遊客前來欣賞獅藝，順便了解黃飛鴻歷史典故，而好多外國人睇完南獅武術表演，日後都再回來拜師學藝。
電影入面的廣東武林高手好多都有個「朵」，以為係增加戲劇性，原來現實生活都有，當日就遇上佛山龍形、白眉高手「賣魚強」，強叔以前賣魚，所以有這個別號，現在係獅藝指導，成日出國交流。
佛山祖廟
地址：廣東省佛山市禪城區祖廟路
時間：9:00am-6:00pm
交通：環島佛山直巴至佛山賓館下車，步行約5分鐘即達；或中港城乘船至平洲港，專車直達。
回到清代小巷
祖廟係佛山地標，原叫「北帝廟」，在北宋時興建，已有九百多年的歷史。經過多次修葺和擴建，有萬福台、靈應牌坊、錦香池、鐘鼓樓、靈應祠、慶真樓等建築，充滿嶺南的風格，顯示了佛山的精湛工藝，是集陶塑、木雕、鑄造、建築藝術於一廟的古建築。
睇完可以到後街祖廟大街一帶走走，到處都係過百年青磚大屋，贊先生定居佛山時的故居亦在裏面，好似回到清代，與「贊師傅、黃飛鴻同行」一樣，好有Mood。
贊先生故居
地址：廣東省佛山市禪城區善慶坊21號
高手炮製 獨門正菜
講食，禪城酒店內的貴華宮就廚藝高手雲集，而且推陳出新，以前他們在佛山區首創鱘龍宴，有不少後來者模仿。而最近又推出秋冬進補藥膳宴，很多菜式都有獨特的做法，美味與療效兼備，很多香港食唔到，到佛山一定要試試。
禪城酒店貴華宮
地址：廣東省佛山市禪城區石灣高廟路6號
電話：（86）757-82966888
時間：7:30am-9:00pm
交通：祖廟走路約5分鐘到達。
明朝精緻手工藝
佛山是中國古代四大名鎮之一，手工業發達，相傳民間藝術源於明朝，各具特色。通過剪、刻、撲、塑、紮、鑄、繪、粘等手法，製作出剪紙、紮作、彩燈、書畫等數十種藝術品。佛山民間藝術研究社創於1956年，繼承和發展佛山民間藝術，當中可以找到不少富有特色的民間傳統工藝，做手信送禮相當有心思。
佛山民間藝術研究社
地址：廣東省佛山市祖廟路5號
電話：（86）757-82229443
時間：9:00am-5:00pm
交通：由祖廟出發，走3分鐘到達。
石灣陶瓷功夫好
石灣陶瓷公仔世界馳名，南風古灶就係明朝建成至今的石灣古陶灶，歷年生產精工陶藝無數，更訓練出功夫一流的陶藝師傅。如果想睇睇石灣出色的陶瓷工藝，去古灶走一轉，就有唔少發現。
南風古灶
地址：廣東省佛山市禪城區石灣高廟路6號
電話：（86）757-82701118
時間：9:00am-5:30pm
交通：由祖廟出發乘的士約￥15以內。
自己去：環島佛山直巴至佛山賓館下車，來回$170，步行約5分鐘即達（環島旅運有限公司：23361111）；或中港城乘船至平洲港，普通等來回各$161一程，專車直達。（珠江客運：28583876）
跟團去：贊師傅故鄉、佛山二天豪華藥膳美食團，成人每位$528，小童$448，另兩天導遊$100，皇崗關口接團。（金濤旅遊：24507450）