沙田陳太問左丁山：「喂，我要去投票，但係唔知投票地點，唔該你同我搵吓得唔得？」投乜票呀？搵唔到投票站，咪唔投囉，使乜咁緊張，陳太話係心意啫，佢聽人講有一個「十八區共同尋找全港最愛景點」分區投票選舉，全港十八區有五十四個景點，首先分區投票選出每區一景點，投票喺十一月六日星期日截止。選出十八區十八個景點之後，進行第二輪全港市民普選，選出三個最愛景點，第二輪投票由十一月二十八日至十二月十八日止，選舉由民政事務總署、康文署、香港測量師學會、香港工程師學會、香港園境師學會協辦，主辦單位係香港建築師學會、十八區區議會、民政事務局。陳師奶老公係工程師學會會員，所以要投番一票，以示支持。
選特首就冇得全民投票，選最愛景點就有，等啲市民過吓普選癮先，唔使等到二○四七！問陳師奶：「沙田有乜靚景入選？」陳師奶話：「係車公廟、望夫石、城門河畔一帶，由沙田大會堂去到畫舫喎。」陳師奶話要選車公廟，佢覺得係沙田最有特色景點，望夫石比較僻，唔係人人上得到去，城門河畔冇乜特別吖，普通一啲。
心諗搵投票站有排煩，上網睇吓先。搵咗一輪，卒之搵到，知道可以在網上投票，於是通知陳師奶，叫佢搵乖仔上網，一切易辦妥。左丁山成日在中環出入，有乜景點可以選呀？（a）中區警署古蹟群、（b）立法會大樓、遮打花園、（c）凌霄閣及山頂纜車。首選應該會係（a）啦，不過（c）會有好多擁躉。灣仔呢？（a）鵝頸橋底打小人、（b）姻緣石（喺邊度？）、（c）大坑舞火龍。灣仔三景真係考起左丁山，唔知灣仔區居民點樣投票？西貢又如何？（a）斬竹灣抗日英烈紀念碑、（b）清水灣佛堂門天后廟及大廟灣刻石、（c）萬宜水庫。自己香港人，睇勻五十四個景點，好多都未去過，真慚愧，大家不妨上www.myheartmyhome.hk睇吓。