意大利甲組聯賽爭持激烈，由第六位至十三位積分相當接近，只得一兩分差距，今晚意甲賽事各隊當仁不讓；好似狀態回勇嘅羅馬已經係一個最好例子，今晚勢要搶分，盡量拉開同森多利亞、烏甸尼斯嘅距離，今仗作客西西里島，愛隊羅馬贏波已變成事在必行。
近兩次羅馬班波都不負所望能夠贏波而回，例如上一次作客對國際米蘭，贏得清脆俐落，一洗以往客場頹風；加上重心人物王子托迪復出，令整體士氣更高昂。唯一美中不足，今仗迪羅斯及捷古停賽，幸好羅馬陣中重有唔少重頭人物互補空缺，好似達葛治，加上麥薩斯及彭路基等人補替，必可解決傷兵問題；再者兩翼方面，文仙尼在右，以及漸漸融入球隊嘅泰迪在左，雙翼齊飛之下，給予前線球員更多供應，入球相應大增。
墨西拿雙箭頭停賽
墨西拿上季主場勝出率錄得百分之五十三嘅佳績，極為硬淨，難怪受讓盤路往往令球迷有錢收，不過今季主場就全食白果未開齋，對住中下游球隊都只能和波收場，不復當年勇，令一眾球迷失去信心；其實今鋪墨西拿想整個鯉魚翻身都好難，前鋒伊利夫以及森柏拿一齊停賽，必對球隊造成一定影響，羅馬今場去硬馬，簡簡單單來個客勝！
有線球彩台主持Rita