梁榮忠被揭與朱慧敏車廂激咀後，即飛赴泰國蘇梅島向女友鍾麗淇認錯箍煲，昨早忠仔一臉憔悴地獨自現身蘇梅島機場，更緊張地閱讀香港報章刊登有關他的新聞。返港後忠仔獨自面對大批傳媒時，坦承自己遇上大風波，現在只等無綫決定如何內部處分，但他會與女友一同面對，言談間透露已箍煲成功，而提起朱慧敏則馬上劃清界線。
梁榮忠日前被踢爆與○四年港姐亞軍朱慧敏車廂激咀後，馬上往泰國蘇梅島，向正在當地學習瑜伽的女友鍾麗淇認錯。香港時間昨早約九時，神情憔悴的忠仔手持旅行袋，獨自現身蘇梅島機場準備返港，記者上前訪問時，他雖表現驚訝，但仍友善地說：「我返香港會回應，我冇唔認，暫時唔講任何嘢住啦。」
自認唔紅
「點解搞到咁大件事？」
忠仔還語帶感觸說：「有樣嘢可以透露，係壓力問題，壓力大啲，都係關於呢件事，你哋有乜嘢睇法呀？」其後他又說：「希望你哋唔好騷擾鍾小姐，佢𠵱家喺一個好寧靜嘅地方，佢淨係同啲朋友上吓瑜伽課程。」
此時忠仔見記者攜來香港報章，即忍不住借來細閱，邊看邊流露凝重神情。臨入閘前忠仔又向記者說：「我都唔係好紅啫，點解搞到咁大件事？但發生呢件事之後，知道邊啲係真朋友邊啲唔係。」
而忠仔於昨午約一時多步出香港機場時，他主動向記者說：「首先我就唔係走佬，唔係要逃避啲乜嘢，呢個係美麗嘅錯摸，之前已經setup呢個plan，本來諗住唔返嚟，因為呢件事，特登搵張機票返嚟香港。」
多謝關心
「同鍾小姐已有共識」
問到鍾麗淇是否已得知忠仔與朱慧敏車廂親熱一事？忠仔即反應甚大地說：「梗係知啦！」那她現在心情如何？忠仔說：「呢件事係我同佢之間嘅事，多謝大家關心，我同鍾小姐之間已經有共識，請大家留幾日時間畀我處理家事，我知道點樣面對同解決。相信任何一對戀人都會遇到風波，今次係大風波，我哋會勇敢一齊面對，姑勿論點，我哋兩個都冇逃避過，鍾小姐亦唔係lastminute知呢件事。」
問到忠仔是否已獲得女友原諒時，他說：「大家畀啲時間我去處理呢個問題先，自己會繼續面對。」再問忠仔會否覺得對不起女友？他說：「自己喺娛樂圈咁多年，工作上冇乜大上落，冇犯錯，今次人生路上的確做錯咗啲事，而且記咗個大過，呢件事係永遠喺自己紀錄入面，我自己好似學生咁讀緊書，睇校監（指無綫）會唔會踢我出校，睇吓校監係咪通情達理，校監幾時畀學生順利上堂，都要畀時間去諗，你哋都畀啲時間我，畀內部處分咗先。」
忠仔在言談間暗示箍煲成功，而當提起朱慧敏他則馬上劃清界線，對於有報道指朱慧敏被無綫雪藏，他說：「關乎朱小姐嘅嘢，由呢一分鐘開始，我唔會再講，唔希望件事沒完沒了，以後唔會再提。希望今日講完之後告一段落，唔使大家辛苦追訪。」問到忠仔與之前傳被他力𠝹的朱凱婷和袁彌明會否繼續做朋友？他說：「牽涉自己以外嘅其他人，都唔會再講。」訪問後忠仔便返回其屯門寓所，稍作休息後再到紅磡開會，至傍晚約六時才返家。
聲淚俱下
朱慧敏認錯照雪藏
此外，朱慧敏昨日上午被無綫製作資源部副總監樂易玲召返公司「照肺」，據知她曾聲淚俱下地認錯，但無綫有感朱慧敏損害港姐形象，決定暫時將她打入冷宮。記者昨日致電樂易玲，問到她可有接受梁榮忠道歉時，她說：「男歡女愛嘅事公司好難干預，最緊要係觀眾接受佢、女友原諒佢。」
對於無綫的處理手法被指大細超，樂易玲否認道：「佢哋情況唔同，港姐係一個代表，而且朱慧敏又身為娛樂節目主持，我今日同佢見過面，佢損害咗港姐形象，我哋唔係雪藏，只係認為佢暫時不宜主持節目，等件事丟淡咗先再作安排。」
採訪、攝影：朱志聰、楊浩賢（蘇梅島）張俊銘、何國豪（香港）
