日前有報道話名模陳嘉容嘅髮型師男友RickyKwok涉嫌藏有違禁藥，俾海關人員拘捕後獲保釋，呢幾日傳媒日日守喺Ricky間髮廊，佢就照常返工，不過就唔多講呢件事，淨係話已經交咗畀律師處理。
咁啱呢幾日陳嘉容就去咗東京行騷，噚日佢同LisaS.一齊落機，佢話：「我有同Ricky聯絡，不過時間撞得唔啱，所以冇詳細傾，成件事我都唔清楚，等我了解咗先啦！」陳嘉容曾經話如果男友掂呢瓣嘢就一定拜拜，噚日佢就話：「都係等我了解咗先啦！」
Amanda力撐
另外，前晚Rosemary、徐子淇、楊崢同AmandaStrang等一班模特兒出席尖沙嘴一個活動，問起Ricky單嘢，大部份人話同Ricky唔熟。
Amanda講開吸毒，佢竟然話：「你哋可以唔認同人吸毒，但係呢個選擇、呢種生活係佢個人嘅事，只要佢返到工作崗位冇事就得啦。」嘩，咁都得？Amanda嘅講法真係教壞人喎！
