劉紹銘教授得閒寫吓英文，寫吓中文，直情係塞錢入讀者個荷包。上星期日（十月三十日）劉教授喺星期日名采版寫「金風送爽」，真係爽，適逢當日氣溫下降至二十一度，打開屋企窗門，東北風吹到左丁山渾身舒泰，飲杯EarlGrey，歎劉教授文章，真係一樂也。
以劉教授之造詣，尚覺得四川大學之公告廣告，問題多多，回天乏術，我哋無謂自毀腦筋。如果嗰篇廣告用作翻譯系學生考試題目，請學生修改完善之，攞到Ａ嘅學生（由劉教授評分），唔怕冇工做。
四川大學慶祝建校一百一十年，來港賣廣告，何故唔搵學校內之英文系高手翻譯，以至弄出笑話？木宰羊。上星期五，《國際先驅論壇報》有一篇長文，講述中國刻意栽培重點大學，務求將北大清華嘅理工科「超英趕美」，達到超一流水平，記者話中國意志不用懷疑，理工科水準大躍進，指日可待，但係中國缺乏學術自由，大學唔鼓勵獨立批判性思考（可比較鄔維庸批黃仁龍，徐四民鬧香港電台唔知邊個係老闆），將會拖慢中國大學之進步，特別係人文/社會科學方面。
北大清華進步成點，我哋唔多知，學生就一定係一流頂，教授水平須搵專家判斷。不久前上海復旦大學慶祝創校一百周年，香港有唔少名人界、學術界人士去上海參加慶典。據幾位出席慶典嘅名人同左丁山講：「慶典過程搞到大家矇查查。以一間名校嚟講，組織上有好多改善空間。」好彩上面啲傳媒好合作，喺香港就會俾報紙玩殘。
無論內地著名大學是否真係叻過香港啲大學，到內地名校讀書，十分政治正確兼可以冧鬼佬大機構。朋友廣告Ｃ住響上海好耐，個乖女在九龍著名女校就讀，英文水準好高，佢已經諗定乖女將來入復旦大學，畢業後到美國名校讀個MBA，咁就係未來嘅一流學歷，兼且精通兩文三言，夠煞食喇啩。